اليسار المتطرف و عقدته من النقاب

سلام لمن له عقل

يا يساريين يا اللي تتدعيو الحداثة و الديمقراطية !! صدعتولنا ريوسنا بحكاياتكم ع  الحريات و بالأخص حرية المرأة !! المرأة لازم نحافظولها ع مكتسباتها .. المرأة التونسية حرة و لازم ما نفرضوش علاها حاجة بالسيف  .. لازم نحميوا المرأة من العنف ... أي كي أنتم حارقين أعصابكم ع خاطر المرأة نحب نسأل : ياخي حملة الدفاع عن الحريات عندكم تجي لحكاية النقاب وتحبس تشد فران ؟؟ شبيكم ما تدافعوش ع المنتقبة ؟؟هي زادا مرأة تونسية عندها حقوق ! شبي المتحجبة و اللي لابسة من غير هدوم عندها الحق تقرا و تخدم و المنتقبة لا ؟؟ آه نسيت أنتم عندكم عقدة من حاجة اسمها نقاب ما نعرفش علاش و كل ما  مرة تطلعولنا بحجة واهية من الحيط .

باهي .. شوفو في فرنسا البلد العلماني ها الزوز بنات شنو عملوا : تحديا للقرار الظالم اللي أصدرته السلطات الفرنسية خرجوا لابسين ميني مع نقاب  وقالو :  

  نحن لا نريد الهجوم او الحط من صوره المسلمين,ولكن تصرفنا هذا يمثل تساؤلا للسياسيين الذين صوتوا للقانون الذي نعتبره غير دستوري.لقد اصبح شغل الدولة الوحيد هو ان تملي علينا ما يجب ان نرتديه

 و هذا كاتب فرنسي  قال مدافعا عن المنتقبات : هؤلاء النساء أشرف من نسائكم !! 

هذا مثال بسيط عن فرنسيين استنكروا قرار السلطة واعتبروه قرار ظالم ويمس من حرية المرأة .. و اللي نستغربو انو في تونس بلد الزيتونة .. تونس البلد اللي من المفروض أنو أغلب شعبها محافظ نلقى ناس كيفكم يهاجموا في النقاب و في نفس الوقت يدعيوا انهم مع الحرية !!!

سبحان الله عندكم حقد غريب تجاه لباس امهات المؤمنين و الصحابيات .. مانيش فاهمة شنية مشكلتكم مع المنتقبة !! نقابها ع وججها و أنتم متقلقين ؟؟ ههههه جات شكاتلكم قالتكم بالله امنعوا النقاب راهو مقلقني ؟؟  و الأغرب من ذلك أنكم تقولو أنكم مع الإختلاف وتحترموا حرية الآخر أما في نفس الوقت ماخليتوش وصف قذر ما لصقتووش للمنتقبات .. هاو مرة أكياس قمامة .. مرة غربان .. و نعم الاحترام !!! و هذا إن دل ع شيء فهو يدل ع مدى احترامكم لمن يخالفكم

تحبو تمنعوا النقاب من الجامعات بحجة أنو المنتقبة مجهولة الهوية .. و تقولو : وقت الامتحانات .. شكون قال اللي هي نفس الشخص مش حد آخر؟؟ حقيقة مشكلة كبيرة برشاااااا و كأنو المنتقبة ما تنجمش تكشف وجهها قدام مرأة و تتعرف عليها .. و كأنو الجامعات و الإدارات ما يخدموا فيهم كان الرجال -_-"... تي ماكم قبل كنتو تحطو ناس وتكلفوهم بمطاردة المتحجبات و كي يلقاو متحجبة دخلت تقرا ديراكت يمشيو يقودوا بيها .. ماكم كنتو تحطوا ناس قدام أبواب المعاهد و الكليات  مهمتهم الوحيدة أنهم يكرهوا المرأة في النهار اللي تحجبت فيه .. والا كي يتعلق الأمر بالقمع تلقاو الحلول أما باش تسهلوا ع المرأة أنها تمارس حريتها ما تنجموش و تولي حكاية صعيبة ومافماش حلول تتكونساو ؟؟؟

تقولو لازم نمنعوا النقاب خاطر ينجم الواحد يستغلوا في حاجات خايبة .. باهي .. نفرضوا أنو شخص لبس زي عون الأمن و قام بجريمة.. نفرضوا ع أعوان الأمن أنهم ماعادش يلبسوا الزي متاعهم؟؟ نفرضوا أنو انسان انتحل شخصية طبيب والا ممرض ويعمل حاجة خايبة(وصارت الحكاية هذه قداش من مرة منهم مرأة سرقت صغير بعد ما لبست طبلية بيضاء ودخلت للمستشفى) .. أش نعملو ؟؟ نفرضوا ع الإطار الطبي يتخلى عن الزي متاعو خاطر فما شواذ يستغلوا فيه لأعمال أخرى ؟؟

عندكم زوز حجج أخرين بصراحة كي نسمعهم يشدني كريز متاع ضحك ... تقولو النقاب مش متاعنا و مش من عاداتنا و تقاليدنا .. أبيْ! يطلعش الميني و البروتال و الدجين من صميم التراث و أحنا ما فيبالناش ؟؟ التاريخ يثبت أنو جداتنا كن محتشمات محجبات و منتقبات منين جيبتولنا انتم العراء (هاو صورة)؟؟ والغريبة اللي تضحك تطلعلك شقنوصة حتى جرد لبسة محترمة ما تلبسهاش و تقلك النقاب مش متاعنا هههه والا تطلعك وحدة تقلك كان تجي طفلة تقرا معايا بالنقاب نمشي نقرا بالمايو !!يا للا كان أخلاقك و تربيتك تسمحلك بذلك فازي أعمل اللي تحب..

 باهي شدوا عندكم ماكم تحبو تمنعوا النقاب خاطرو لباس دخيل باهي ياسر نعملوا قانون يمنع المواطنين من لبس أي هندام غير تونسي .. يعني النساء الكل يرجعوا يلبسوا السفساري و الحايك و المريول الفضيلة و الرجال يرجعوا للكبوس و الجبة و البرنوس .. تحبوا هكة ؟ تحبوا المحافظة ع الموروث التونسي أبداو برواحكم !! ولو أني متأكدة أنو فما بنات لو يصدر قانون كيما هكة بالرغم انهي مستبعدة الحكاية الا ما يفصلو السفساري بيكيني و يلبسوه هههههههه لا علينا

الحجة الثانية اللي تضحكني : النقاب مش من الدين نحن سنة مالكية و ماناش وهابية !! بصراحة الجملة هذه ما يقولها كان إنسان جاهل .. أي نعم إنسان جاهل بالدين خاطر النقاب موجود في الاسلام و اختلفو في حكمه العلماء هل هو فرض أم فضل و أني عن نفسي نتبنى الرأي هذا للقرضاوي .. لا علينا مانيش مش ندخل لتفصيل المسألة هذه ماعليكم كان ترجعوا لأقوال العلماء وحدكم ما نحبش نصدمكم يجعل بلاكم على غير يديا .. المهم .. نمشي معاكم في الخط كالعادة و نفرضوا جدلا أنو النقاب مش الدين .. توا هذه حجة باش تحبوا تمنعوه ؟؟ يعني ع حسابكم أنتم نطالبوا بقانون يمنع كل لباس مش موجود في الدين وبما انو حسب رأيكم النقاب مش موجود مش يتمنع هكة وفات المشكلة .. استنى عاد ... والتبرج موجود في الدين ؟؟ العراء اللي نشوفوا فيه في الشوارع التونسية موجود في الإسلام ؟؟ بالطبع لا و نتحدى أي واحد يجيبلي حجة ع أنو التبرج مسموح بيه في الاسلام .. شعملنا مالا ؟؟ هاو ع حسابكم هكة يولي فما قانون يجبر على ارتداء الحجاب !!! تحبوا هكة ؟؟ هههههههه وقتها تو توليو تستنكروا و معارضين بالطبع ما تدافعوا ع الحرية كان كي تولي حريتكم انتم مهددة اما كي تمسوا حرية غيركم عادي و أنا ضد مثل هذه القوانين الموجودة في برشا بلدان اسلامية لأنها تولد النفاق.

أي شنوة الحل مالا ؟؟ الحل أنو كل انسان ما يتدخلش في حرية غيره وخليو المرأة التونسية حرة و يزيو من لعب دور الوصي عليها ..  وقبل ما تطالبو بالمساواة بين المرأة و الرجل حققوا المساواة بين المرأة والمرأة !!! وراهي حكاياتكم و ها الحرب الوهمية ضد مظاهر التدين و اللي تسميوها انتم ظلامية و رجعية مالهي الا زوبعة في فنجان خاطركم تواجهوا في نساء شعارهن الثبات على النقاب حتى يوارينا التراب ويزيكم من افتعال المشاكل  و احداث البلبلة في البلاد ع قضايا المفروض أننا تجاوزناها...احترموا حريتنا و سيب صالح  !!

تحياتي :))